terça-feira, 6 de junho de 2017

MANIFESTU POLÍTIKU PARTIDU LIBERTASAUN POPULÁR (PLP) NIAN

.

Partido Libertasaun Popular - 06 de junho de 2017

Ita iha mehi ida-ne’ebé hatudu dalan mai ita iha moris tomak: liberta Pátria no halo Timor-Leste sai País ida-neébé Forte, Riku no Seguru.

Durante ha’u-nia mandatu tinan lima hanesan Prezidente Repúblika (2012-2017) ha’u hala’o moris hakbesik ho Timoroan sira-nia moris loro-loron hosi suku 442 iha territóriu nasionál tomak, no ha’u haree katak sira sei moris iha kondisaun sira-ne’ebé kiak, maske iha promesa sira tuir-tuir malu atu hetan moris ida-ne’ebé di’ak liu. Ita oras ne’e tama iha momentu ida-ne’ebé krítiku ba ita-nia Istória, ne’ebé desizaun sira mak ita foti oras ne’e sei iha impaktu ba ita no ba jerasaun sira tuirmai.

Buat ida mak lejítimu atu hamosu pegunta: ba sira-ne’ebé luta iha tinan 24 nia laran ba independénsia no mós tinan 15 ba dezenvolvimentu, tempu hirak tan mak ita sei tenke luta atu hetan moris di’ak?
Momentu mak oras ne’e, no oras ne’e kedas ona! Ita labele hein tan ona!

Situasaun ne’e susar, laiha ema ida mak dehan oin seluk. Maibé, laiha buat ida mak imposível, se ita serbisu hamutuk, no tane malu. Timor-Leste hasoru problema sira-ne’ebé kompleksu, ne’ebé sei labele iha solusaun imediata ida, sein iha envolvimentu ativu hosi ita-nia sidadaun sira—nu’udar na’in loloos ba destinu País ida-ne’e nian—iha prosesu dezenvolvimentu. Ho de’it sidadaun sira-neébé empeñadu no responsável mak ita sei iha dezenvolvimentu ida-ne’ebé loloos no País ida-ne’ebé pertense ba Povu. Ita-nia vizaun ne’e klaru, nune’e mós ita-nia ambisaun ne’e klaru: liberta Pátria no halo Timor-Leste sai País ida-neébé Forte, Riku no Seguru.

Timoroan sira iha hakarak atu halo mudansa. Ba sira mak ita tau ita-nia fiar.

Vizaun

Liña Boot sira ba Orientasaun Jerál iha Tempu Naruk

Ita-nia vizaun ne’e simples: liberta Pátria no halo Timor-Leste sai País ida-neébé Forte, Riku no Seguru. Atu konkretiza Vizaun ida-ne’e, se karik ita hetan konfiansa atu ukun, ita sei konsentra, iha tinan lima tuirmai, iha área boot lima ne’ebé tuirmai sei temi, ne’ebé sei sai permanente, no tenke kontinua atu iha nafatin ba governu oin-oin sira:

1. Reforsa Independénsia Nasionál—liuhosi promosaun sistema ekonómiku ida-ne’ebé viavél, koerente no sustentável, hanesan mós ho konsolidasaun Identidade Nasionál.

2. Defeza, Integridade Territoriál no Soberania Nasionál—liuhosi hadi’a, entre outrus, iha nível sistema defeza no seguransa, konsiensializasaun públika no diplomasia.

3. Konstrusaun Sistema Ekonómiku ida-ne’ebé Koerrente no Sustentável—esensialmente liuhosi kualifikasaun ba ita-nia rekursu umanu, konsolidasaun setór privadu nasionál atu sai interveniente liután, utilizasaun rasionál ba rekursu umanu, kombate dependénsia esterna no kriasaun setór ekonomia ne’ebé forte liután.

4. Konsolidasaun Unidade, Koezaun Sosiál no Demokrasia—liuhosi rekoñesimentu ba sidadaun sira-nia direitu fundamentál sira, fó resposta ba nesesidade bázika sira no reforsu ba toleránsia.

5. Integrasaun Rejionál no Internasionál—liuhosi partisipasaun ida-ne’ebé ativa liután iha organizasaun sira-ne’ebé Timor-Leste pertense ba, ho maneira espesiál iha ONU no CPLP, nune’e mós promosaun ba esforsu sira hotu iha sentidu atu tama ba ASEAN, konsolidasaun relasaun ho país sira hotu iha rejiaun ne’e no parte seluk mundu nian, kumpri konvensaun sira hotu, paktu no memorandu entendimentu sira-ne’ebé ratifika no asina tiha ona hosi Timor-Leste, kooperasaun ativa ho orgaun Estadu sira hotu iha akordu sira iha futuru, no preparasaun Timor-Leste nian ho vistu ida atu tama ba iha Commonwealth.

Liña Boot sira ba Orientasaun Espesífika iha Tempu Médiu

1. Modelu Sivilizasaun—liuhosi armonizasaun entre ita-nia kultura tradisionál aziátika no eransa kulturál europeia (Kristianizmu no Lian Portugés).

2. Modelu Governasaun—liuhosi Governasaun ida-ne’ebé Integrada, atu edifika, dezenvolve no prezerva solusaun sira ho parseria hamutuk ho sosiedade sivil, liuliu benefisiáriu sira no entidade interesadu sira iha setór oin-oin atividade nian. GOVERNU INTEGRADU IDA-NE’EBÉ MOOS, ONESTU NO EFISIENTE!

3. Modelu Dezenvolvimentu—liuhosi modelu dezenvolvimentu ekonómiku ida-ne’ebé integradu no sustentável, ne’ebé permiti atu prodús liután no fahe di’ak liután rekursu sira ba Timoroan sira hotu nia benefísiu.

4. Tranzisaun Jerasionál—liuhosi valorizasaun rekursu umanu; promosaun kultura ida responsabilidade nian, fó prémiu ba sira-ne’ebé iha méritu no fasilita Timor-Leste nia oan sira-ne’ebé di’ak liuhotu atu hetan igualdade ba oportunidade, hodi bele koko sira-nia kapasidade iha mundu ida-ne’ebé sai globalizadu no inter-ligadu liután. Prepara ohin loron atu bele hetan líder sira loron aban nian!

PROGRAMA ELEITORÁL NO GOVERNASAUN

Área tolu urjente ne’ebé presiza atu tau iha konsiderasaun:

1. Identidade

a) Halibur mate ruin hosi eroi sira-neébé mate liu tinan 17 nia laran no hato’o omenajen ba sira.

b) Rekonstrusaun ba uma lulik, kapela sira no integra buat sira-neé iha planu promosaun turístika.

c) Valorizasaun ba lia na’in sira-nia knaar, hodi rekupera sira-nia knaar iha justisa tradisionál tanba prevene konflitu sira.

d) Salva memória kona-ba Moradór sira hanesan ezérsitu tradisionál ba dahuluk iha orijen ba ita ita-nia Forsa Armada Moderna.

e) Valorizasaun ba feto sira-nia traje no ornamentu (mortén no manu-fulun) no feto sira-nia instrumentu perkusaun tradisionál sira (batuke no gongu sira).

f) Valorizasaun ba mane sira-nia traje no ornamentu sira, hanesan belak no kaibauk.

g) Valorizasaun ba ita-nia rituál tradisionál sira, ourivesaria no produsaun hena sira.

Hanesan rezumu: ita-nia identidade, ita-nia istória no kultura ne’e iha valór ekonómiku ne’ebé boot no bele fomenta atu hamosu indústria ki’ik sira.

2. Integrasaun

a. Veteranu no Antigu Kombatente sira –Ninia integrasaun sosiál sei bele sai potensiál se ita hatene atu aproveita esperiénsia sira iha lideransa, organizasaun no mobilizasaun komunidade ba atividade produtiva sira (kooperativa, asosiasaun, no seluk-seluk tan), liuliu iha organizaun sira foin-sa’e nian. Ba ida-ne’e, presiza atu halo revizaun ba Estatutu Kombatente Libertasaun Nasionál nian, hodi transforma sistema pensaun atuál sira ba oportunidade atu hala’o ekonomia.

b. Juventude—Joven ida-idak tenke iha misaun ida iha moris. Sira tenke hetan orientasaun atu iha objetivu sira-ne’ebé konkretiza sira-nia mehi. Nune’e, iha aspetu esensiál lima atu garante katak joven sira ohin loron nian sei sai ema responsável iha loron aban, dezignadamente mak: formasaun superiór no formasaun tékniku-profisionál, servisu síviku, servisu militár obrigatóriu, insersaun iha merkadu servisu, formasaun síviku-patriótika, brigada sira atu kombate hamalaha no desnutrisaun, degradasaun meiu-ambiente, analfabetismu, no seluk-seluk tan.

c. Traballadór no Agrikultór sira—mak sira-neébé hala’o tiha ona sakrifísiu atu aumenta ekonomia familiár. Presiza atu iha mikrokréditu hodi prodús ho maneira rentável. Presiza mós atu iha orientasaun no formasaun atu koñese métodu sira-ne’ebé di’ak liu no prátika sira-ne’ebé rentável liután iha merkadu. Sai solidáriu liután ho sira no apoia sira. Agrikultura familiár de’it okupa ona área rurál pursentu 80. Agrikultura la’os kiak; maibé, sai nu’udar fonte ida ba riku-soi!

d. Jéneru—Igualdade direitu entre feto no mane ne’ebé bazeia ba méritu no ba iha kompeténsia. Valorizasaun ba feto nia knaar iha País nia dezenvolvimentu ekonómiku.

3. Governasaun Integrada

Governasaun Integrada bazeia ba kooperasaun, partisipasaun no lideransa kolaborativa, la’ós de’it ba departamentu governamentál sira, maibé mós ba instituisaun sira seluk (privadu no voluntáriu sira) hodi fó resposta ho forma ida-neébé efisiente no efikás ba problema sosiál sira-ne’ebé Povu hasoru loro-loron, kombate morozidade, desperdísiu, burokratizasaun, no seluk-seluk tan. Implementa sistema komunikasaun ida-ne’ebé fasilita kontaktu entre administrasaun no benefisiáriu sira, bele monotoriza implementasaun programa sira no avalia nia rezultadu sira.

Ho nune’e de’it maka ita bele dezenvolve objetivu nasionál boot sira; ho nune’e de’it maka ita bele iha País ida-ne’ebé pertense loloos ba Povu.

Oras to’o ona atu implementa sistema ida ho desizaun, asaun no rezultadu! GOVERNASAUN INTEGRADA IDA-NEÉBÉ MOOS, ONESTU NO EFISIENTE!

PROGRAMASAUN

I. Moris-di’ak

a) Agrupa área abitasaun no ordenamentu territóriu ba zona urbana no rurál sira. Dezenvolvimentu planu estratéjiku ida ba abitasaun.

b) Bee-Moos no Saneamentu Báziku—disponibilizasaun atu iha apoiu liután ba bee-moos no saneamentu báziku. Hemu bee-moos no iha saneamentu báziku ida-ne’ebé dignu, sai nu’udar sidadaun sira-nia direitu ida. Ita labele kontinua atu moris sein iha sistema tratamentu ida ba bee reziduál sira. Falta saneamentu koloka risku ba sustentabilidade bee nian no ba saúde públika!

c) Alimentasaun no Nutrisaun—garante alimentasaun no nutrisaun ida-ne’ebé adekuadu ba Timoroan sira hotu. Promosaun ba kombate nutrisaun la di’ak ba labarik sira no aumentu ba nível nutrisaun inan sira-nian.

d) Eletrisidade—pursentu 80 hosi populasaun iha asesu ba eletrisidade, maibé la komprende responsabilidade atu iha utilizasaun ne’ebé iha kuidadu; Fó atensaun ba ita-nia emeprezáriu sira-nia nesesidade sira, ne’ebé presiza fonte enerjia ho menus despeza boot. Diversifika fonte enerjia sira.

e) Edukasaun – sistema edukativu ida-ne’ebé favorese ba País nia dezenvolvientu (ensinu sekundáriu, ensinu tékniu profisionál no universitáriu); ekuidade iha distribuisaun bolsu estudu; jestaun eskolár efisiente atu hadi’a kualidade ensinu; insentivu formasaun ba kuadru médiu no superior sira-ne’ebé kualifikadu hodi kompete iha merkadu internu no rejionál. Iha tempu Rezisténsia soldadu ida-idak iha nia kilat. Iha tempu dezenvolvimentu estudante ida-idak iha nia livru sira!

f) Saúde—anualmente gasta barak iha saúde, maibé sidadaun sira dook loos atu sai saudável. Zona urbana no rurál sira bele sai saudável no atrativu liután, se sidadaun sira hetan insentivu atu moris iha estilu moris ida-ne’ebé saudável. Promosaun ba meius sira atu hala’o prevensaun, tratamentu no kura ba moras prinsipál sira iha zona rurál no urbana sira. Planeamentu no lideransa iha akizasaun ba teknolojia di’ak liuhotu iha área saúde. Reforma polítika jestaun medikamentu nian.

g) Seguransa Sosiál—seguransa sosiál efisiente, transparente no iha proximidade atu hadi’a protesaun sosiál, hodi asegura sidadaun sira-nia direitu báziku sira no igualdade atu hetan oportunidade. Ita labele simu abandonu ba ita-nia sidadaun sira, portadór sira defisiénsia nian, partikularmente sira-ne’ebé vulnerável liu (idozu, isin-rua, no inan solteira sira). Ba ema vulnerável ida-idak, iha planu moris!

II. Setór Produtivu—diversifikasaun ekonomia País nian; dezenvolvimentu setór produtivu (primáriu, sekundáriu no tersiáriu); revitalizasaun merkadu servisu; formasaun rekursu umanu; estabelesimentu mekanizmu komersializasaun no konservasaun sustentável; dezenvolvimentu turizmu; orientasaun produsaun produtu orgániku sira hodi iha finalidade atu halo esportasaun, tanba falta ekonomia sira iha eskala País nian.

III. Konetividade—sistema transporte estrada no ponte sira, nune’e mós aeroportu no transporte maríitmu sira, ne’ebé posibilita ita-nia deslokasaun iha terrritóriu nasionál no liga ita ho mundu. Maibé, infra-estrutura sira-ne’e labele planeia de’it ba ita-nia repouzu. Tenke iha atensaun ba prioridade ekonómika sira País nian no rentabilidade ba investimentu sira. Inkluzaun ba teknolojia infomasaun ho informátika, rede komputadór sira, Internet, no seluk-seluk tan.

IV. Ekonomia no Finansa Públika—garante dezenvolvimentu ekonómiku ida-ne’ebé integradu no sustentavel, menus dependente ba Fundu Mina-rai; garante igualdade atu hetan oportunidade; halibur liután, hodi diversifika fonte reseita sira; jere ho loloos, hodi evita gastu demaziadu sira; investe liután iha setór estratéjiku no fundamentál sira ho retornu iha tempu badak, médiu no naruk; aumenta investimentu iha infra-estrutura rurál sira, iha investigasaun no estensaun ba servisu agríkola sira; hasa’e produtividade ekonomia liuhosi diversifikasaun no modernizasaun teknolójika (espesialmente ba setór sira ho valór agregadu no utilizasaun servisu-ho-liman nian ne’ebé intensivu); kapasita istituisaun finanseira nasionál sira hodi insentiva asesu boot liután ba servisu bankáriu no finanseiru sira nian ba ema hotu.

V. Defeza Nasionál, Seguransa no Relasaun Esterna—Defeza Nasionál: aposta ba iha rekursu umanu ne’ebé kualifikadu liután; konsolidasaun modelu profisionalizmu F-FDTL, no PNTL nian no instituisaun sira seluk ho finalidade atu iha: valorizasaun ba projetu kooperasaun tékniku-militár, liuliu ho rai sira-ne’ebé tama iha área rejionál sira ho interese estratéjiku ba Timor-Leste; konsolidasaun sistetama integradu ba Defeza no Seguransa; adosaun prinsípiu komplementaridade, kooperasaun no subsidiarieade. Seguransa: reforsu sentimentu seguransa ba sidadaun sira; reforsu seguransa ba munisípiu sira no Rejiaun Administrativa Oe-cusse Ambeno, prevensaun no represaun ba kriminalidade, liuhosi medida lejizlativa no operasionál sira; seguransa komunitária no polisiamentu proximidade. Relasaun Esterna: promosaun ba Timor-Leste nia partisipasaun ativa iha sentru sira foti desizaun nian, tantu iha nível bilaterál, no mós iha nível multilaterál ho benefísiu mútua.

VI – Justisa, Direitus Umanus no Demokrasia

Justisa: promosaun ba justisa ida-ne’ebé simples liután no sein iha burokrasia desnesesáriu ne’ebé benefisia ba ema hotu, espesialmente ba sira-ne’ebé desfavoresidu sira; hala’o lalais ba desizaun judisiál no hadi’a kualidade desizaun judisiál. Direitus Umanus: liuhosi defeza ba ema umana nia dignidade; protesaun ba sidadaun indefezu sira; konstrusaun sosiedade ida-ne’ebé harii iha respeitu ba Timoroan ida-idak nia direitu fundamentál sira. Demokrasia: liuhosi aperfeisoamentu ba demokrasia ne’ebé implika reforma ba instituisaun sira, sidadaun sira-nia partisipasaun demokrátika, toleránsia iha aseitasaun, respeitu no konsiderasaun ba diferensa, vivénsia ba valór no prinsípiu sira Estadu direitu nian.

VII – Pólu Dezenvolvimentu sira

Dezafiu sira atu kria Pólu Dezenvolvimentu ida-ne’ebé integradu, ekilibradu no sustentável ne’e sai nu’udar oportunidade ida-ne’ebé estraordinária ba Timor-Leste, hodi garante distribuisaun ida-ne’ebé justu ba rekursu nasionál sira. Pólu Dezenvolvimentu neen sira-ne’e mak:

Primeiru Pólu–Lospalos
Segundu Pólu–Baucau no Viqueque
Terseiru Pólu–Manatuto (área sentrál)
Kuartu Pólu–Suai, Maliana, Same, Ainaro, Aileu no Ermera
Kintu Pólu–Díli, Liquiça no Ataúro
Sestu Polu–Oe-cusse Ambeno

Kada pólu hosi Pólu Dezenvolvimentu neen ne’e funsiona hanesan fatin kbiit sira-ne’ebé provoka transformasaun estruturál signifikativu, habelar produsaun no kria servisu ba sidadaun sira-nia moris di’ak.

Vota ba PLP katak vota ba mudansa!
Labele lakon tempu!
.

Sem comentários:

Publicar um comentário

Nota: só um membro deste blogue pode publicar um comentário.