terça-feira, 6 de junho de 2017

Taur: Ha’u Koñese Di’ak Maun Xanana

.

Timor Post - 06 Junu 2017 - Transcrição cortesia de José Salvação para o Timor Hau Nian Doben

DILI- Prezidente Partidu Libertasaun Popular (PLP), Taur Matan Ruak, hatete, nia koñese diak liu Ministru Planeamentu Investimentu Estratejiku (MPIE), Xanana Gusmão, tanba servisu hamutuk durante tinan 17 iha tempu rejisténsia.

“Agora ema barak maka ho Maun Xanana, mas ha’u ho maun Xanana tujuh belas tahun (17), Wakil Panglima, tanba ne’e ha’u koñese di’ak liu maun Xanana,” dehan Taur foin hafoin partisipa konsolidasaun PLP iha Postu Administrativu Na’in Feto, Minisípiu Dili, Domingo (04-06) foin lalais ne’e.

Eis Prezidente Repúblika ne’e hatutan, sira barak ne’ebé maka agora tuir iha Xanana ne’e la koñese Xanana ho di’ak maibé hakarak aprobeita,

“Maun Xanana nia hanoin di’ak mas sira halo maun Xanana naran hotu fo’er tanba ema ne’ebé hadomi maun Xanana ne’e iha ne’ebá laiha, sira ne’ebá ne’e só aproveira maun Xanana maka iha, maibé sira la hadomi maun Xanana,” Taur subliña.

“Tanba ne’e maka maun Xanana foti Kalbuadi ne’e di’ak liu hili Taur de’it ona,” haktenik nia.

Entretantu bainhira ba jornalista sira Taur to’o agora nia la hirus malu ho Xanana.

“Ami relasaun di’ak, ha’u laiha buat ida, ha’u la deve maun Xanana nia buat ida tanba ne’e ami hirus malu kona-ba saida nian, anaun ser sira maka hirus ha’y karik maibé ha’u laiha buat ida,” nia dehan.

Iha parte seluk, iha konsolidasaun PLP ne’e, Taur ko’alia mós kona ba kompetisaun iha eleisaun parlamentár fulan oin.

“Eleisaun agora mai ne’e poténsial ba ema naín tolu, Kalbuadi, Mari Alkatiri, Taur Matan Ruak, tanba ne’e hatete ba sira sé vota ba maun Kalbuadi entaun nia maka ukun fali Timor, sé vota Mari entaun nia maka sei ukun filafali, uluk ukun la hotu tan, tanba ne’e ha’u hanoin dalan seluk laiha maka Taur Matan Ruak ona,” dehan Taur liuhosi nia intervensaun iha konsolidasaun PLP iha Postu Administrativu Na’in Feto, Minisípiu Dilu,Domingo (04-06) foin lalais ne’e.

Tuir Taur, tinan sanulu resin lima (15) povu Timor-Leste lakon barak ona, no lakon saugati de’it, tanba ne’e maka partidu PLP moseu, ne’e sei diak liu partidu hotu iha Timor.

“Tanba ha’u hatete ba imi katak, imi la hili ha’u ne’e imi rugi boot tanba Fretilin ukun ona tinan lima maun Mari sai tiha, maun Xanana ukun tinan 10 sai tiha fó fali ba maun Rui."

Nia dehan, entre sira na’in tolu maka sei hadau malu Primeiru Ministru maibé nia kontente tanba inan feton sira joven bele suporta nia ba Primeiru Ministru.

“Maibé sira barak dehan PLP partidu foun ne’ebé bele halo ka la’e, ita bele tanba imi nia Prezidente ne’e jenerál ida ne’ebé jenerák Indonézia de’it mós la tahan. Ha’u hatete ba imi katak ita-nia partidu foun maibé mai ho ita-nia ideia ne’ebé foun mós, tanba ne’e importante ba ita nia sidadaun sira,” katak nia. (ino)
.

Sem comentários:

Publicar um comentário

Nota: só um membro deste blogue pode publicar um comentário.